. 
बनावट लुटीचा बनाव फसला! डोळ्यात तिखट फेकून १०.५० लाख लुटल्याचा दावा करणाऱ्यावरच खर्डा पोलिसांची कारवाई
जामखेड प्रतिनिधी
जामखेड-खर्डा महामार्गावरील सतेवाडीफटा येथे डोळ्यात मिरची पूड टाकून तब्बल १० लाख ५० हजार रुपये व मोबाईल लुटल्याचा बनाव करून पोलिसांची दिशाभूल करण्याचा प्रयत्न करणाऱ्या इसमाचा खर्डा पोलिसांनी अवघ्या काही तासांत पर्दाफाश केला. पोलिसांच्या प्राथमिक तपासात तक्रारदारानेच खोटी लूट घडल्याचे भासविल्याचे समोर आले असून, या प्रकरणी तक्रारदार बालाजी अर्जुन लांडगे (वय ३९, रा. सुर्वेगल्ली, खर्डा) याच्याविरुद्ध खर्डा पोलीस ठाण्यात भारतीय न्याय संहितेच्या कलम २१२ अन्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, दि. ८ सप्टेंबर २०२६ रोजी दुपारी सुमारे १२ वाजता खर्डा पोलीस ठाण्यात डायल ११२ वर एक कॉल प्राप्त झाला. खर्डा परिसरातील सतेवाडी फाट्याजवळ बालाजी लांडगे यांच्या डोळ्यात मिरची पूड टाकून त्यांच्याकडील १० लाख ५० हजार रुपये आणि मोबाईल लुटण्यात आल्याची माहिती कॉलद्वारे देण्यात आली. मोठ्या रकमेच्या लुटीची माहिती मिळताच खर्डा पोलिसांनी घटनेचे गांभीर्य ओळखून तातडीने तपासाची चक्रे फिरवली.
सहाय्यक पोलीस निरीक्षक गणेश जाधव, पोलीस उपनिरीक्षक अशोक खेडकर आणि त्यांच्या सहकाऱ्यांचे पथक तात्काळ घटनास्थळी दाखल झाले. पोलिसांनी घटनास्थळाची बारकाईने पाहणी करून कथित लुटीबाबत उपलब्ध पुरावे आणि परिस्थितीची तपासणी केली.
तक्रारदाराने दिलेल्या माहितीनुसार, तो पुण्याहून खर्ड्याकडे येत असताना विना नंबरच्या दोन स्प्लेंडर मोटरसायकलवरून आलेल्या व्यक्तींनी त्याची गाडी अडवली आणि डोळ्यात मिरची पूड टाकून लूट केली, असा दावा करण्यात आला होता. मात्र, पोलिसांनी घटनास्थळाची पाहणी केल्यानंतर कथित लुटीशी संबंधित कोणतीही ठोस अथवा संशयास्पद बाब त्यांच्या निदर्शनास आली नाही. त्यामुळे पोलिसांचा संशय अधिक बळावला.
यानंतर पोलिसांनी जामखेड रोडवरील उपलब्ध सीसीटीव्ही कॅमेऱ्यांचे फुटेज तपासण्यास सुरुवात केली. तक्रारदाराने सांगितलेल्या वर्णनानुसार दोन विना नंबरच्या स्प्लेंडर मोटरसायकली त्या मार्गावरून गेल्याचे फुटेजमध्ये आढळून आले नाही. त्यामुळे तक्रारदाराच्या कथनातील विसंगती पोलिसांच्या लक्षात आली.
घटनेतील विविध बाबींची पडताळणी केल्यानंतर पोलिसांनी बालाजी लांडगे यांची अधिक सखोल आणि कसून चौकशी केली. चौकशीदरम्यान त्यांच्या जबाबातील विसंगती समोर येऊ लागल्या. पोलिसांनी उपलब्ध सीसीटीव्ही फुटेज, घटनास्थळाची परिस्थिती आणि तक्रारदाराने दिलेली माहिती यांची सांगड घातल्यानंतर अखेर कथित लुटीमागील बनाव उघडकीस आला.
पोलिसांच्या चौकशीत लांडगे यांनी खर्डा शहरातील काही लोकांकडून घेतलेले पैसे परत करण्याची जबाबदारी टाळण्यासाठी हा बनाव रचल्याची कबुली दिल्याचे पोलिसांनी सांगितले. म्हणजेच, प्रत्यक्षात कोणतीही लूट झाली नसताना १० लाख ५० हजार रुपये आणि मोबाईल लुटल्याची खोटी माहिती देऊन पोलिसांची दिशाभूल करण्यात आली होती.
खोटी माहिती देणे पडले महागात
पोलिस यंत्रणेची दिशाभूल करून खोटी माहिती दिल्याप्रकरणी बालाजी अर्जुन लांडगे यांच्याविरुद्ध भारतीय न्याय संहिता कलम २१२ अन्वये गुन्हा दाखल करण्यात आला आहे. या प्रकरणाचा पुढील तपास पोहेकॉ संभाजी शेंडे करीत आहेत. या घटनेमुळे पोलिसांनी केलेली तातडीची कारवाई, घटनास्थळाची पाहणी तसेच सीसीटीव्ही फुटेजच्या आधारे तपास करून काही तासांतच कथित लुटीचा बनाव उघडकीस आणल्याचे स्पष्ट झाले आहे.
ही कारवाई मा. पोलीस अधीक्षक सुदर्शन मुमक्का, अपर पोलीस अधीक्षक वैभव कलुबर्गे, उपविभागीय पोलीस अधिकारी सुजितकुमार क्षीरसागर यांच्या मार्गदर्शनाखाली करण्यात आली. सपोनि गणेश जाधव, पोउनि अशोक खेडकर, संभाजी शेंडे, शशी म्हस्के, बाळू खाडे, राहुल खेडकर आणि प्रवीण थोरात यांच्या पथकाने या तपासात महत्त्वाची भूमिका बजावली.
‘डायल ११२’चा गैरवापर करू नका
खर्डा पोलिसांनी नागरिकांना आवाहन केले आहे की, डायल ११२ ही सुविधा नागरिकांच्या तातडीच्या सुरक्षेसाठी आणि आपत्कालीन मदतीसाठी उपलब्ध करून देण्यात आली आहे. या क्रमांकावर खोटी माहिती देणे, पोलिसांची दिशाभूल करणे अथवा विनाकारण पोलिस यंत्रणेला त्रास देणे हे गंभीर प्रकरण असून, अशा प्रकारे गैरवापर करणाऱ्यांवर कठोर कायदेशीर कारवाई केली जाईल.
(उज्वलसिंह राजपूत, सहाय्यक पोलीस निरीक्षक, खर्डा पोलीस स्टेशन)
