एसटी बस न आल्याने खाजगी वाहनातून प्रवास करताना टमटम पलटी, शाळेतील 16 विद्यार्थी जखमी

एसटी बस न आल्याने खाजगी वाहनातून प्रवास करताना टमटम पलटी, शाळेतील 16 विद्यार्थी जखमी

संतप्त ग्रामस्थ व पालकांनी खर्डा बस स्थानकास लावले कुलूप

जामखेड प्रतिनिधी

खर्डा बस स्थानकात शाळा सुटल्यानंतर जामखेड, ईट ही बस न आल्याने मुंगेवाडी व पखरुड येथील 30 विद्यार्थी खाजगी टमटम मधून घरी जात असताना ड्रायव्हरचा टमटम वरील ताबा सुटून सदरचा टेम्पो हा बेलेश्वर फाटा या ठिकाणी पलटी झाल्याने यामधील 16 शालेय विद्यार्थी जखमी झाले आहेत. तर चार विद्यार्थी हे गंभीर जखमी झाल्याचे प्रत्यक्ष दर्शनी सांगितले आहे.
या अपघाताची माहिती कळताच संतप्त ग्रामस्थ व पालकांनी खर्डा बस स्थानकास कुलूप लावून एसटी महामंडळाचा निषेध व्यक्त केला.

खर्डा येथील रयत शिक्षण संस्थेत शिकणारे शालेय विद्यार्थी हे मुंगेवाडी व पखरूड येथून दररोज ये जा करतात आज दिनांक 27 डिसेंबर रोजी शाळा सुटल्यानंतर विद्यार्थी हे एसटी बस स्थानकात जामखेड ईट या बसची घरी जाण्यासाठी वाट पाहत होते. परंतु बस न आल्याने 30 विद्यार्थी हे खाजगी टमटम प्रवास करून घरी चालले होते, परंतु बेलेश्वर फाटा याठिकाणी सदरची टमटम पलटी झाल्यामुळे 12 विद्यार्थी हे जखमी झाले तर 4 विद्यार्थी हे गंभीर जखमी झाले आहेत. ही माहिती कळताच खर्डा पोलीस स्टेशनचे पोलीस नाईक संभाजी शेंडे पोलीस कॉ. शेषराव मस्के पोलीस कॉ. अशोक बडे यांनी तातडीने त्या ठिकाणी जाऊन मदत केली.

सदर टमटमचा नंबर MH – 04 FU 0654 असून ड्रायव्हर हा मंदधुंद अवस्थेत होता तोही जखमी झाल्याने त्याच्या सहित सर्व जखमी विद्यार्थ्यांना खर्डा व जामखेड येथील हॉस्पिटलमध्ये उपचारासाठी दाखल करण्यात आले आहे या अपघातामुळे संतप्त झालेल्या पालक व खर्डा ग्रामस्थांनी एसटी बस न आल्याच्या निषेधार्थ खर्डा व स्थानकाला कुलूप लावून एसटी महामंडळाचा निषेध केला आहे. तसेच याबाबत जामखेड एसटी बस आगाराकडून उचित कारवाई न झाल्यास यापुढे उग्र आंदोलन केले जाईल असा इशारा मा.सरपंच संजय गोपाळघरे व ग्रामपंचायत सदस्य महालिंग कोरे यांनी दिला आहे.

खर्डा बस स्थानकात शाळेत येणारे विद्यार्थी, विद्यार्थिनी शाळा सुटल्यानंतर जाणाऱ्या विद्यार्थ्यांची संख्या शेकडोंच्या प्रमाणात असल्याने याठिकाणी सतत वर्दळ असते परंतु अनेक वेळा विद्यार्थ्यांना जाण्या येण्यासाठी एसटी महामंडळाकडून योग्य वेळेत बस पाठवल्या जात नसल्यामुळे अनेक विद्यार्थ्यांना याचा फटका बसत आहे. याबाबत जामखेड आगार प्रमुखांकडे वेळोवेळी तक्रारी करण्यात आल्या होत्या परंतु याबाबत त्यांनी अद्याप पर्यंत कोणतीच दखल घेतली नाही यापुढे तरी त्यांनी विद्यार्थ्यांसाठी वेळेवर बस पोहोचावेत अशी अपेक्षा पालक वर्गातून केली जात आहे. यावेळी बबलू सुरवसे, दादा जावळे, सुशील शिंदे, गणेश नेहरकर इत्यादी सह पालक व ग्रामस्थ उपस्थित होते.