आई वडिलांच्या कष्टाचे चीज, चहावाल्याचा मुलगा बनला एमबीबीएस डॉक्टर
डॉ. प्रदीप ढवळे याने मिळवले एमबीबीएस मध्ये यश
जामखेड प्रतिनिधी
छोट्याशा चहाच्या व्यावसायावर व अडचणींचा सामना करताना प्रकाश उर्फ (बंडु) ढवळे यांनी यांनी जिद्दीने स्वतःच्या मुलाला एमबीबीएस डॉक्टर केले आहे. यासाठी वेळ प्रसंगी पोटाला चिमटा घेऊन त्यांनी त्यांच्या मुलाच्या शिक्षणाकडे लक्ष दिले आहे. घरच्या परिस्थितीची जाण असलेल्या प्रविणने देखील मेहनतीने, चिकाटीने स्वतःला सिद्ध केले आहे. शेतात आई काबाड कष्ट करते तर वडील चहाचे दुकान चालवतात आशा आईवडिलांच्या कष्टाची जाण ठेवत प्रवीणने एमबीबीएसची ही पदवी प्राप्त करून त्यांचा विश्वास सार्थ केला आहे.
जामखेड शहरातील असलेल्या प्रसिद्ध ‘हॉटेल पुढारी वड ’चे संचालक प्रकाश उर्फ (बंडू) ढवळे यांचे चिरंजीव डॉ. प्रदीप प्रकाश ढवळे याने आपली एमबीबीएस पदवी यशस्वीपणे पूर्ण केली आहे. मुंबई येथील प्रतिष्ठित नायर हॉस्पिटल आणि मेडिकल कॉलेजमधून त्यांने हे शिक्षण पूर्ण केलं हे कौतुकास्पद आहे. त्यांच्या या यशामुळे संपूर्ण जामखेड शहरात आणि परिसरातील नागरिक कौतुक करत शुभेच्छा देत आहेत.
डॉ. प्रदीप यांचे बालपण अगदी सामान्य परिस्थितीत गेले. वडिलांचे वडाच्या झाडाखाली चहाचे आणि लहानसं हॉटेल सांभाळत त्यांनी आपल्या मुलाला चांगले शिक्षण मिळावे यासाठी अहोरात्र मेहनत घेतली. डॉ.प्रदीप यांनी देखील त्यांच्या कष्टाचे चीज करीत अत्यंत कठोर अभ्यास, शिस्त आणि धैर्य याच्या जोरावर वैद्यकीय शिक्षणात प्रवेश मिळवला आणि अखेर एमबीबीएस पदवी प्राप्त केली. या यशानंतर जामखेड मधील अनेक सामाजिक कार्यकर्ते, शिक्षक, राजकीय व प्रशासकीय व्यक्ती तसेच स्थानिक नागरिक आणि मित्रमंडळींनी डॉ. प्रदीप याचे व त्यांच्या कुटुंबियांचे अभिनंदन केले आहे. अनेक जणांनी सामाजिक माध्यमांवरून शुभेच्छांचा वर्षाव करत, त्यांच्या यशाचे कौतुक केले आहे. डॉ. प्रदीप यांचं यश हे केवळ त्यांच्या कुटुंबासाठी नव्हे, तर संपूर्ण जामखेडसाठी अभिमानाची बाब आहे. जिद्द, मेहनत आणि चिकाटी असल्यास कोणतीही पार्श्वभूमी आड येत नाही. हे या यातुन सिध्द होत आहे.
जामखेडसारख्या ग्रामीण भागातून वैद्यकीय क्षेत्रात प्रवेश करून मोठं यश मिळवणं हे नक्कीच प्रेरणादायी आहे. डॉ. प्रदीप यांनी आपल्या पुढील वाटचालीसाठी सर्वांची शुभेच्छा घेतल्या असून, भविष्यात समाजासाठी चांगली सेवा करण्याचा निर्धार त्यांनी व्यक्त केला आहे.
चौकट
दुसरा मुलगा देखील एमबीबीएसच्या दुसर्‍या वर्षाला
प्रकाश उर्फ बंडु ढवळे यांचे पंचायत समिती कार्यालया जवळ चहाचे दुकान आहे ते लहानपणा पासुन चहाचे दुकान चालवतात तर आई ही घरकाम करुन शेती करते. बंडु ढवळे हे जरी चहाचे दुकान चालवत असले तरी त्यांनी आपल्या दोन्ही मुलांच्या शिक्षणाकडे बारकाईने लक्ष दिले. सध्या एका मुलाचे एमबीबीएसचे शिक्षण पुर्ण झाले तर दुसरा मुलगा रोहित ढवळे हा सांगली जिल्ह्य़ातील इस्लामपूर येथिल प्रकाश हॉस्पिटल ॲंन्ड रिसर्च सेंटर या कॉलेजमध्ये द्वितीय वर्षाला एमबीबीएस चे शिक्षण घेत आहे.
