१५ हजाराची लाच घेताना ग्रामसेवक व सरपंचाचा पती अडकला लाचलुचपतच्या जाळ्यात
जामखेड
जामखेड प्रतिनिधी
तालुक्यातील वाघा येथिल महात्मा गांधी राष्ट्रीय रोजगार हमी योजनेंतर्गत वैयक्तिक जलसिंचन विहीर खोदण्याचा प्रस्ताव मंजूर करून तो पंचायत समिती जामखेड येथे पाठवण्या करिता तक्रारदार यांच्याकडून १५ हजार रुपयांची लाच घेताना ग्रामसेवकासह सरपंच पती या दोघांना अहमदनगर येथील लाचलुचपत प्रतिबंधक विभागाच्या पथकाने रंगेहाथ पकडले यामुळे जामखेड तालुक्यात एकच खळबळ उडाली आहे.
याबाबत अधिक माहिती अशी की तक्रार यांच्या पत्नीच्या नावे मौजे वाघा येथे गट नं. ११४ मध्ये सुमारे दोन हेक्टर क्षेत्र आसुन सदर क्षेत्रावर महात्मा गांधी राष्ट्रीय रोजगार हमी योजने अंतर्गत वैयक्तिक जलसिंचन विहीर खोदण्याकरिता प्रस्ताव तक्रारदार यांनी तयार करून ग्रामपंचायत वाघा येथे सादर केला होता. सदर विहीर खोदण्याचा प्रस्ताव मंजूर करून तो पंचायत समिती जामखेड येथे पाठवण्याकरिता येथील ग्रामसेवक नेताजी भाबड व खाजगी व्यक्ती सरपंच पती शामराव बारस्कर हे लाचेची मागणी करत होते.
यानंतर तक्रार यांनी याबाबत अहमदनगर येथील लाचलुचपत प्रतिबंधक विभागाकडे तक्रार दाखल केली होती. यानंतर लाचलुचपत विभागाकडून दि २२ व २३ फेब्रुवारी रोजी लाच मागत असल्या बाबत पडताळणी केली होती. या पडताळणी दरम्यान वरील ग्रामसेवक व सरपंचाच पती हे लाच मागत आसल्याचे निदर्शनास आले. त्यामुळे लाचलुचपत प्रतिबंधक विभागाच्या पथकाने काल दि २८ फेब्रुवारी रोजी सकाळी सापळा लावला असता तक्रारदार यांच्याकडून पंचासक्षम १५ हजार रुपयांची लाच ग्रामसेवक भाबड यांनी खाजगी इसम सरपंच पती शामराव बारस्कार यांच्या मार्फत घेताना बारस्कर यांना रंगेहाथ पकडले.
यानंतर लाचलुचपत प्रतिबंधक अहमदनगर विभागाच्या वतीने आरोपी वाघा येथिल ग्रामसेवक नेताजी शिवाजी भाबड, वय-५० वर्षे, ग्रामसेवक, वाघा ग्रामपंचायत, ह. रा. तपनेश्वर रोड, जामखेड, रा. न्याती इबोनि-४, फ्लॅट नं. ४१, उंडरी गाव, पुणे व शामराव माणिकराव बारस्कर, वय-५३ वर्षे, धंदा-नोकरी, प्राध्यापक- जामखेड महाविद्यालय, जामखेड, रा. वाघा, पो. नान्नज, ता. जामखेड, जि. अहमदनगर, ह. मु. कार्ले यांचे फ्लॅट मध्ये भाड्याने, शिवनेरी अँकडमी जवळ, विकास नगर, बीड रोड, जामखेड यांच्या विरोधात गुन्हा दाखल करण्यात आला आहे.
सदरची कारवाई लाचलुचपत प्रतिबंधक अहमदनगर सापळा व तपास अधिकारी राजू आल्हाट, पोलिस निरीक्षक, ला. प्रा. वि. अहमदनगर, सहाय्यक सापळा अधिकारी शरद गोर्डे, पोलिस निरीक्षक, ला. प्र. वि. अहमदनगर सापळा पर्यवेक्षण अधिकारी प्रवीण लोखंडे, पोलीस उपअधीक्षक, ला प्र. विं, अहमदनगर, सापळा पथक मपोना राधा खेमनर, पोलिस अंमलदार बाबासाहेब कराड, गजानन गायकवाड, पो.हे.कॉ हारून शेख व दशरथ लाड यांच्या पथकाने केली आहे.
