फिनोलेक्स कंपनीच्या वतीने भाविकांना प्रवासासाठी उपयुक्त साहित्याचे वाटप
संत वामनभाऊ पालखी सोहळ्यात वारकऱ्यांचे उत्स्फूर्त स्वागत; काठी, पिशवी व रेनकोटचे वितरण
जामखेड प्रतिनिधी
जामखेड शहरातून मार्गस्थ झालेल्या संत वामनभाऊ महाराज पालखी सोहळ्यात सहभागी झालेल्या हजारो वारकरी भाविकांचे फिनोलेक्स पाईप्स तसेच शितल कलेक्शन, जामखेड यांच्या वतीने उत्साहपूर्ण स्वागत करण्यात आले. या निमित्ताने भाविकांना प्रवासात उपयुक्त ठरणारे साहित्य म्हणून काठी, मजबूत कापडी पिशवी आणि रेनकोट यांचे मोफत वाटप करण्यात आले. या सेवाभावी उपक्रमाला वारकऱ्यांचा उत्स्फूर्त प्रतिसाद लाभला.
या उपक्रमासाठी जामखेड शहरातील तपनेश्वर रोड येथे आकर्षक व भव्य स्वागत कमान उभारण्यात आली होती. तसेच रस्त्याच्या दोन्ही बाजूंना साहित्य वितरणासाठी स्वतंत्र स्टॉल उभारण्यात आले होते. वारकऱ्यांचे टाळ-मृदुंगाच्या गजरात आणि विठ्ठलनामाच्या जयघोषात स्वागत करण्यात आले. साहित्य वितरणासाठी स्वयंसेवकांनी नियोजनबद्ध व्यवस्था केल्यामुळे कोणतीही गैरसोय न होता हजारो भाविकांना साहित्याचे वाटप करण्यात आले.
प्रवासादरम्यान चालताना आधार मिळावा म्हणून काठी, वैयक्तिक साहित्य सुरक्षित ठेवण्यासाठी मजबूत पिशवी आणि पावसापासून संरक्षणासाठी रेनकोट असे उपयुक्त साहित्य मिळाल्याने वारकऱ्यांनी समाधान व्यक्त केले. या उपक्रमामुळे प्रवास अधिक सुखकर होणार असल्याची भावना अनेक भाविकांनी व्यक्त करत आयोजकांचे आभार मानले.
फिनोलेक्स कंपनीचे अधिकृत डिलर व शितल कलेक्शनचे संचालक अंदुरे कुटुंबीयांनी या उपक्रमाचे उत्कृष्ट नियोजन केले होते. अंदुरे कुटुंबातील सर्व सदस्य वारकऱ्यांच्या स्वागतासाठी दिवसभर सेवेत कार्यरत होते. विशेष म्हणजे विठ्ठल-रुक्मिणीच्या वेशभूषेत सजलेल्या चिमुकल्यांनी भाविकांचे लक्ष वेधून घेतले. त्यांच्या वेशभूषेचे व भक्तिभावाचे वारकऱ्यांनी मनापासून कौतुक केले.
यावेळी फिनोलेक्स कंपनीचे एरिया सेल्स मॅनेजर योगेश राऊत, एरिया असिस्टंट सेल्स मॅनेजर दादासाहेब गडाख, शितल ट्रेडर्सचे संचालक उमाकांत रावसाहेब अंदुरे, सागर उमाकांत अंदुरे, गजानन अंदुरे, वसंत दादा कोळपकर, महेश मासाळ, मनोजशेठ दुग्गड तसेच शितल कलेक्शन व शितल ट्रेडर्सचा संपूर्ण स्टाफ उपस्थित होता. साहित्य वितरणासाठी महिलांनीही मोठ्या संख्येने सहभाग नोंदवत सेवाभावी कार्यात मोलाची भूमिका बजावली. वारकरी संप्रदायाच्या सेवेला वाहिलेला हा उपक्रम सामाजिक बांधिलकी आणि भक्तीभाव यांचे सुंदर उदाहरण ठरला. फिनोलेक्स कंपनी व शितल कलेक्शन यांच्या या सेवाभावी उपक्रमाचे वारकरी, नागरिक आणि उपस्थित मान्यवरांकडून विशेष कौतुक करण्यात आले.
