धक्कादायक: जामखेड तालुक्यातील दोन मित्रांनी पिंपरी चिंचवड येथे एकाच झाडाला गळफास घेत केली आत्महत्या
आत्महत्या केलेले दोन्ही तरुण जामखेड तालुक्यातील पिंपळगाव उंडा येथील
जामखेड प्रतिनिधी
जामखेड तालुक्यातील पिंपळगाव उंडा येथील दोन मित्रांनी एकाच दिवशी एकाच झाडाला गळफास घेऊन आयुष्याचा शेवट केल्यानं पिंपरी चिंचवड हादरलंय. निर्जन स्थळी जाऊन आपल्या आयुष्याची दोरी कापली आहे. दोन्ही मित्रांनी झाडाला गळफास घेत आत्महत्या केलीय. एकाच दिवशी दोन्ही मित्रांनी आत्महत्या केल्याने जामखेड तालुक्यात मोठी खळबळ उडालीय. तुषार अशोक ढगे वय 25 वर्ष, व सिकंदर सलाउद्दीन शेख वय 30 वर्ष, दोघे रा. पिंपळगाव उंडा ता. जामखेड जि. आहील्यानगर अशी आत्महत्या केलेल्या तरुणांची नावे आहेत.
या घटनेप्रकरणी मिळालेल्या माहितीनुसार, जामखेड तालुक्यातील पिंपळगाव उंडा येथील दोन तरुणांनी पिंपरी चिंचवड येथील मोशी एमआयडीसी भोसरी पोलीस स्टेशन हद्दीतील भारत माता चौका जवळील खिरीड वस्ती येथील एका लिंबाच्या झाडाला गळफास घेत आत्महत्या केलीय. तुषार अशोक ढगे आणि सिकंदर सलाउद्दीन शेख हे दोघे एकमेकांचे मित्र आहेत. काल ते जामखेड तालुक्यातील पिंपळगाव उंडा येथील त्यांच्या मूळ गावावरून पुण्यातील पिंपरी चिंचवड भागातील मोर्शी येथील भारत माता चौक या ठिकाणी आले होते. पण आज त्या दोघांचे मृतदेह एकाच वेळी एकाच झाडाला लटकलेल्या अवस्थेत आढळून आले आहेत. प्राथमिक तपासात त्यांनी आत्महत्या केल्याचे समोर येत आहे.
या प्रकरणी एमआयडीसी भोसरी पोलीस स्टेशनला गुन्हा दाखल करण्यात आला आहे. या घटनेचा पोलीस पुढील तपास करीत आहेत. घटनेची माहिती मिळताच मयत तुषार ढगे व सिकंदर सलाउद्दीन या दोघांचेही नातेवाईक जामखेड तालुक्यातील पिंपळगाव उंडा येथुन घटनास्थळी पोहचले आहेत. पोलिसांन कडुन त्यांच्या कुटुंबीयांकडे चौकशी केली जात असुन दोघा मित्रांनी नेमकी आत्महत्या का केली याचे कारण शोधले जात आहे. संपुर्ण तपास केल्यानंतरच या घटनेचा उलगडा होणार आहे. या घटनेतील आत्महत्या केलेल्या तुषार अशोक ढगे वय 25 वर्ष हा अविवाहित आहे तर त्याचा दुसरा मित्र सिकंदर सलाउद्दीन शेख आणि 30 वर्ष याचे लग्न झालेले आहे. दोघा मित्रांनी एकाच वेळी गळफास घेऊन आत्महत्या केल्याने जामखेड तालुक्यात एकच खळबळ उडाली आहे.
