सत्यजित तांबेना पाठिंबा देणाऱ्या जिल्हाध्यक्षाला कॉंग्रेसकडुन कारणे दाखवा नोटीस
अहमदनगर : विधान परिषदेच्या नाशिक पदवीधर मतदारसंघातून अपक्ष उमेदवारी दाखल केलेले सत्यजीत तांबे यांची कोंडी करण्याचे काँग्रेस ठरविल्याचे दिसते. त्यांच्यासंबंधीचा पक्षाचा अधिकृत निर्णय अद्याप झालेला नाही. मात्र, त्यांना पाठिंबा व्यक्त करणारे पक्षाचे अहमदनगर जिल्हाध्यक्ष बाळासाहेब साळुंखे यांना मात्र पक्षाने कारणे दाखवा नोटीस पाठविली आहे.
बाळासाहेब साळुंखे हे कर्जत तालुक्यातील असून ते ज्येष्ठ नेते बाळासाहेब थोरात यांचे समर्थक मानले जातात. त्यामुळेच त्यांना जिल्हाध्यक्षपद मिळाल्याचे सांगण्यात येते. नाशिक पदवीधर मतदारसंघात राजकीय घडामोडी सुरू असताना साळुंखे यांनी स्थानिक वृत्तपत्रांना मुलाखती देताना तांबे यांना पाठिंबा देत असल्याचे वक्तव्य केले होते.
पक्षाने डॉ. सुधीर तांबे यांच्यावर केलेली निलंबनाची कारवाई चुकीची असून आता संपूर्ण अहमदनगर जिल्हा काँग्रेस तांबे यांच्या पाठीशी राहील, असे वक्तव्य साळुंखे यांनी केले होते. सत्यजीत तांबे यांच्या कामाचेही साळुंखे यांनी कौतुक करून त्यांच्यावर अन्याय होत असल्याचे म्हटले आहे. या बातम्यांची कात्रणे प्रदेश कार्यालयाकडे केली. त्यानुसार पक्षाचे सरचिटणीस (प्रशासन व संघटन) प्रमोद मोरे यांनी जिल्हाध्यक्ष साळुंखे यांना कारणे दाखवा नोटीस पाठविली आहे.
त्यामध्ये म्हटले आहे की, ‘आपण नाशिक पदवीधर मतदारसंघातील अपक्ष उमेदवार सत्यजीत तांबे यांना पाठिंबा देणार असल्याचे वृत्तपत्रात प्रसिद्ध झाले आहे. प्रदेशाध्यक्ष नाना पटोले यांच्या सूचनेवरून आपल्याला कळविण्यात येते की, ही बातमी आपण प्रसिद्ध केली आहे की इतर कोणी? याचा खुलासा दोन दिवसांच्या आत प्रदेश कार्यालयाकडे लेखी स्वरुपात पाठवावा.’
अहमदनगर जिल्ह्यात यावरून काँग्रेसमध्येही दोन मतप्रवाह झाल्याचे दिसून येते. काही मंडळी अध्यापही तांबे यांना पाठिंबा देण्याच्या मनस्थितीत असल्याचे दिसून येते. तर दुसरीकडे प्रदेश कार्यालयाने घेतलेल्या निर्णयाचेही समर्थन करणारे पदाधिकारी आहेत. तांबे यांना स्थानिक पातळीवर पक्षाकडून पाठिंबा मिळू नये, अशी व्यवस्था प्रदेशाकडून केली जात असल्याचे यावरून दिसून येते. साळुंखे हे पक्षाचे जिल्हाध्यक्ष आहेत. त्यामुळे त्यांची भूमिका महत्वाची आहे. त्यामुळे ते आता यासंबंधी प्रदेश काँग्रेसकडे काय खुलासा करतात, प्रत्यक्ष प्रचारात काय भूमिका घेतात, याकडे लक्ष लागले आहे.
