जामखेड येथे उद्यापासून ४ दिवशीय भव्य-दिव्य शिवराज्याभिषेक सोहळ्यास सुरवात
भारूड, कीर्तन, भव्य दिव्य मिरवणूकीचे आदी कार्यक्रमांचे आयोजन
सालाबादप्रमाणे याही वर्षी दि. ६ ते ९ जून दरम्यान जामखेड शहरात शिवराज्याभिषेक सोहळ्यानिमित्त शिवराज्याभिषेक उत्सव समिती जामखेडच्या वतीने विविध कार्यक्रमांचे आयोजन करण्यात आले आहे. यामध्ये भारूड, कीर्तन, रक्तदान शिबीर व भव्य दिव्य मिरवणूक या कार्यक्रमांचा समावेश आहे. या सर्व कार्यक्रमांमध्ये सहभागी होऊन राज्याभिषेक सोहळ्याची शोभा वाढवावी असे आवाहन आयोजकांच्या वतीने करण्यात आले आहे.
स्वराज्याचे संस्थापक छत्रपती महाराज यांच्या राज्याभिषेक सोहळ्यानिमित्त उद्या शुक्रवार दि ६ जून रोजी रात्री ८ ते १० भारूड सम्राट गोविंद महाराज गायकवाड भारूड मंडळ आळंदी देवाची यांचे तुफान विनोदी सोंगी भारूड, शनिवारी दि. ७ जून रोजी रात्री ८ ते १० वाजताचे दरम्यान संत एकनाथ महाराजांचे १४ वे वंशज हभप योगीराज महाराज गोसावी (पैठण) यांचे कीर्तन, रविवारी दि. ८ जून रोजी सकाळी ८ ते सायंकाळी ५ पर्यंत भव्य रक्तदान शिबिर, तर रात्री ८ ते १० वाजताचे दरम्यान शिवशाहीर हभप कल्याण महाराज काळे (शेवगाव) यांचे कीर्तन होईल हे सर्व कार्यक्रम जामखेड शहरातील छत्रपती संभाजी महाराज मार्ग तहसील कार्यालयाच्या समोर या ठिकाण होणार आहेत.
याबरोबरच सोमवार दि. ९ जुन रोजी पहाटे सप्तनद्या, गडकोट किल्ले, तीर्थक्षेत्र येथून आणलेल्या पवित्र जलाने शिवछत्रपतींच्या मूर्तीवर अभिषेक करण्यात येईल. तर दुपारी २:१५ वाजता छत्रपती शिवाजी महाराज कृषी उत्पन्न बाजार समिती पासून श्री शिवराज्याभिषेक सोहळ्यानिमित्त भव्य दिव्य अशी मिरवणूक निघणार आहे. या भव्य मिरवणूकीत श्री छत्रपती संभाजी महाराज यांची भव्य मूर्ती, भव्य शिवमुर्ती, मराठा आरमार भव्य जहाज प्रतिकृती, महाराष्ट्रातील नावाजलेले ढोल पथक, लेझीम पथक, हलगी पथक, संभळ वाद्य पथक, नंदी पथक, शिवकालीन युद्ध कला असलेले चित्तथरारक मर्दानी खेळ लाठी काठी शस्त्र पथक, देव मामलेदार बॅन्जो, पंजाबी वाद्य अशी विशेष लक्ष्यवेधी पथके असणार आहेत. अशा प्रकारे विविध कार्यक्रमाचे शानदार सादरीकरण करण्यात येणार आहे. तरी या भव्य दिव्य डोळ्याचे पारणे फेडणाऱ्या कार्यक्रमाचा समावेश असणाऱ्या छत्रपती शिवाजी महाराज यांच्या राज्याभिषेक सोहळ्यात मोठ्या संख्येने सहभागी व्हावे राहावे असे आवाहन शिवराज्याभिषेक उत्सव समिती जामखेड च्या वतीने करण्यात आले आहे.
