जामखेड शहरात उपमुख्यमंत्री अजितदादाच्या स्वागताचे आमदार रोहित पवाराचे बॅनर, चर्चाना आले उधान
जामखेड प्रतिनिधी
उपमुख्यमंत्री अजित पवार यांचा आज विधानसभा निवडणुकीनंतर पहिल्यांदाच जामखेड दौरा येत असुन त्याच्या स्वागताची जय्यत तयारी करण्यात आली आहे. दरम्यान राष्ट्रवादीच्या फुटीनंतर अजित पवार पहिल्यांदाच आमदार रोहित पवारांच्या कर्जत-जामखेड मतदारसंघात तर अजित पवारांच्या स्वागताचे शरदचंद्र पवार गटाचे आमदार रोहित पवार यांच्या नावाने बॅनर लावण्यात आले आहेत.
उपमुख्यमंत्री अजित पवार आज जामखेड दौऱ्यावर येत आहेत. राष्ट्रवादी काँग्रेसच्या फुटीनंतर अजित पवार पहिल्यांदाच जामखेडच्या दौऱ्यावर येत आहे. अजित पवार यांच्या स्वागतासाठी जामखेडमध्ये बॅनरबाजी करण्यात आली आहे. या बॅनरमध्ये रोहित पवार यांच्या नावानेही बॅनर आहेत. या बॅनरबाजीची राजकीय चर्चा सुरू झाली आहे. जामखेडमध्ये नेमकं काय घडतेय? या चर्चेने जोर धरला आहे.
एकसंध राष्ट्रवादी काँग्रेस फुटल्यानंतर रोहित पवार यांनी शरद पवार यांच्यासोबतच राहण्याच निर्णय घेतला. पण नुकत्याच झालेल्या विधानसभा निवडणुकीत अजित पवार यांनी रोहित पवार यांच्याविरोधात मतदारसंघात एकही सभा घेतली नाही. अजित पवार यांनी ही बाब रोहित पवारांना बोलून दाखवली होती. त्यावर राम शिंदे यांनी आपली उघड नाराजी व्यक्त केली होती. त्यातच आता अजित पवार कर्जत जामखेडच्या दौऱ्यावर येत आहेत. त्यांच्यासाठी लावण्यात आलेल्या बॅनरवर रोहित पवार यांचा फोटो आणि उल्लेख आहे. कर्जत-जामखेडच्या पावन भूमीत स्वागत, आशा आशयाचे बॅनर आहेत.
उपमुख्यमंत्री म्हणून शपथ घेतल्यानंतर अजित पवार कर्जत जामखेडच्या दौऱ्यावर येत आहेत. शिव-फुले-आंबेडकर यांच्या संयुक्त जयंती महोत्सवानिमित्ताने आज दि 17 रोजी सायंकाळी सहा वाजता जामखेड येथे उपमुख्यमंत्री अजित पवार उपस्थिती लावणार आहे. त्यांच्या सोबत विधानपरिषदेचे सभापती राम शिंदेहेही असणार आहे. विधानसभा निवडणुकीनंतर प्रथमच अजित पवार यांचा हा अहिल्यानगर जिल्ह्याचा दौरा असणार आहे.
विधानसभा निवडणुकीत अजित पवार यांनी एकही सभा न घेतल्यामुळे आमदार राम शिंदे यांनी नाराज व्यक्त केली होती. मी तुझ्या मतदारसंघात आलो नाही, नाहीतर तुझं काही खरं नव्हतं.. असे अजित पवार यांनी आमदार रोहित पवार यांना बोलून दाखवले होते. यावरून आमदार राम शिंदे आणि उपमुख्यमंत्री अजित पवार यांच्यामध्ये शाब्दिक वाद निर्माण झाला होता. त्यानंतर प्रथमच आता दोघेही एकाच व्यासपीठावर येणार आहेत. त्याचबरोबर जिल्ह्याचे पालकमंत्री राधाकृष्ण विखे पाटील प्रथमच जामखेड शहरात येत आहेत. विधानसभेनंतर सभापती राम शिंदे, उपमुख्यमंत्री अजित पवार आणि पालकमंत्री राधाकृष्ण विखे पाटील एकाच व्यासपीठावर येत असल्यामुळे जामखेडमधून तिघेही आज काय बोलणार याकडेच जिल्ह्याचे लक्ष लागले आहे.
