शिवसेनेच्या नगरसेवकावर गोळीबाराचा प्रयत्न, गोळी कट्ट्यात अडकली.. भर चौकात थरार!
अहमदनगरः पारनेर शहरातील मुख्य चौकात असणाऱ्या हॉटेल दिग्विजय समोर गुरुवारी सकाळी सव्वादहाच्या दरम्यान नगरसेवक युवराज पठारे यांच्या छातीला गावठी कट्टा लावत गोळीबार करण्याचा प्रयत्न झाला. परंतु कट्ट्यात ही गोळी फसल्याने फक्त आवाज झाला. पुढील गोळी झाडण्याच्या आधीच तेथील एकाने पिस्तूल हिसकवल्याने पुढील अनर्थ टळला.
या घटनेला जुन्या वादाची किनार असल्याची चर्चा आहे. घटनेची माहिती समजताच युवराज पठारे समर्थकांनी पारनेर शहरात व पोलीस स्टेशन परिसरात गर्दी केली होती. आरोपी हा रांजणगाव मस्जिद येथील अल्पवयीन आहे. पारनेर शहरातील बसस्थानक परिसरात मुख्य चौकात गुरुवारी सकाळी सव्वादहा वाजता शिवसेना नगरसेवक युवराज पठारे हे आपल्या तीन ते चार मित्रांसह आले होते.
रांजणगाव मस्जिद येथील अल्पवयीन तरुणाने हातात गावठी कट्टा व चाकू घेऊन पठारे यांच्या छातीला गावठी कट्टा लावला. कट्ट्यातून आरोपीने पठारेंवर गोळी झाडण्याचा प्रयत्न केला. परंतु त्या ठिकाणी उपस्थित असलेल्या एकाने तरुणाच्या हातातील गावठी कट्टा हिसकावला. उपस्थित तरुणांनी हल्लेखोरास चोप देत पोलिसांच्या ताब्यात दिले. आरोपीसोबत असणारे दोन तरुण पळून गेले असून सीसीटीव्ही मध्ये हा प्रकार कैद झाला आहे. त्यामुळे या सिस्टीव्हीच्या माध्यमातून अन्य दोन जणांचा शोध पारनेर पोलिस घेत आहेत.
अल्पवयीन हल्लेखोर पारनेरमध्ये महाविद्यालयीन शिक्षण घेत आहे. जुन्या भांडणातून हा वाद या टोकाला पोहोचला असून महाविद्यालयीन तरुणांनी गावठी कट्टा कुठून आणला याचा तपास सुरू आहे. त्यांच्यासोबत असणारे दोन तरुण पळून गेले, सीसीटीव्हीमध्ये हा प्रकार कैद झाला आहे. सीसीटीव्हीच्या माध्यमातून अन्य दोघांचा शोध पारनेर पोलिस घेत आहेत. तर पकडलेला हल्लेखोर मी एकटाच असल्याचे पोलिसांना सांगत आहे.
दरम्यान, शिवसेनेचे नगरसेवक युवराज पठारे यांच्यावर गुरुवारी सकाळी गोळीबार करण्याचा प्रयत्न झाल्यानंतर या घटनेने पारनेर तालुक्यात एकच खळबळ उडाली.
