मंगळवेढा तालुक्यातील भिमा नदीच्या पात्रात एकामागोमाग चार जणांचा बुडन दुर्दैवी मृत्यू!
मंगळवेढा :मंगळवेढा तालुक्यातील सिद्धापूर येथे मोठी दुर्घटना घडली आहे. या परिसरातील जिल्हा परिषद शाळेजवळ असणाऱ्या भीमा नदीच्या पात्रात नेपाळमधील चार जणांचा पाण्यात बुडून मृत्यू झाला आहे. ही घटना काल दुपारी ३ वाजण्याच्या सुमारास घडली.
मृतांमध्ये बालूदमाई करणसिंग नेपाळी (वय ३५ वर्ष), सौ मनसरादमाई महेंद्रसिंग नेपाळी (वय ३३ वर्ष), हिरदेश महेंद्रसिंग नेपाळी (वय ८ वर्ष), नमुना करणसिंग नेपाळी (वय ११ वर्ष) यांचा समावेश आहे. या दुर्दैवी घटनेत दोन महिला, एक लहान मुलगी आणि एक मुलगा यांना जीव गमवावा लागला आहे. हे सर्व मूळचे राहणार मुक्काम पोस्ट जम्बुकांध, तालुका जिल्हा द्रेलेख, राज्य, कर्णाली प्रदेश, नेपाळ येथील आहेत.
याबाबतची अधिक माहिती अशी की, नेपाळमधील गुरखे उपजीविकेसाठी रात्रीचे गस्त घालण्यासाठी देशभर फिरत असून मंगळवेढा तालुक्यातील सिद्धापूर गावामध्ये सहा दिवसांपूर्वी आले होते. सिद्धापूर गावात भाड्याने एक घर घेऊन ही दोन कुटुंबे राहत होती. मात्र गुरुवारी दुपारी कुटुंबातील महिला लहान मुलांना घेऊन कपडे धुण्याकरिता सिद्धापूर येथील जिल्हा परिषद शाळेच्या पाठीमागे गेले असताना कपडे धुऊन झाल्यानंतर लहान मुलाने अचानक पाण्यात उडी मारली.
यावेळी पाण्याचा अंदाज न आल्याने खोल खड्ड्यात तो बुडाला. त्याला वाचवण्यासाठी प्रथम बालूदमाई करणसिंग नेपाळी या महिलेने उडी मारली. त्यानंतर मुलीने उडी मारली व तिला वाचवण्यासाठी दुसऱ्या महिलेनेही उडी मारली. असे एकापाठोपाक उडी मारल्याने सर्वजण नदीपात्रात बुडाले.
याबाबतची माहिती गावकऱ्यांना कळताच पोलीस पाटील यांनी तात्काळ मंगळवेढा पोलीस स्टेशनला माहिती दिल्यानंतर उपविभागीय पोलीस अधिकारी राजश्री पाटील, पोलीस निरीक्षक रणजीत माने यांनी घटनास्थळी भेट देऊन पोलिसांनी गावकऱ्यांच्या व बेगमपूर येथील भुई यांच्या मदतीने प्रथम महिलांचे मृतदेह बाहेर काढले. त्यानंतर सायंकाळी सहा वाजता दोन लहान मुलांचे मृतदेह बाहेर काढण्यात पोलिसांना यश आले.
दरम्यान, रात्री उशिरापर्यंत शवविच्छेदन करण्यासाठी मंगळवेढा येथील ग्रामीण रुग्णालयात मृतदेह ठेवण्यात आले होते. अधिक तपास सहाय्यक पोलीस निरीक्षक बापूसाहेब पिंगळे करत आहेत.
