नवी दिल्ली : (रोखठोक न्यूज) तुरुंगात सामान आणण्यासाठी कैदी वेगवेगळे प्रकार करत असतात. अशात एका कैद्याने असं काही केलं की सगळ्यांची झोप उडाली. कैद्याच्या पोटामध्ये तस्करीसाठी आणलेले थेट ५ मोबाईल सापडले आहेत. यामुळे पोलिसांसह डॉक्टरांनाही मोठा धक्का बसला आहे.
सध्याच्या जगात काय होईल याचा नेम नाही. अशात एक असा प्रकार समोर आला, ज्यामुळे पोलीस आणि डॉक्टर दोघेही हैराण झाले आहेत. जेलमध्ये असलेल्या एका कैद्याच्या पोटात एक-दोन नव्हे तर तब्बल पाच मोबाईल सापडले आहेत. या घटनेमुळे सगळ्यांनाच धक्का बसला आहे. हे मोबाईल पोटात गेले कसे? असा प्रश्न सगळ्यांच्या मनात आहे.
मिळालेल्या माहितीनुसार, कारागृहात आणलेले हे फोन इतर कैद्यांना तस्करी करून विकून पैसे कमवायचे होते. पण हेच फोन आता या कैद्याच्या जीवाचं जाळे बनले आहेत. कैद्याच्या पोटात सापडलेले हे फोन बाहेर काढणं अशक्य आहे. यासाठी कारागृह अधिकारी तज्ज्ञ डॉक्टरांचा सल्ला घेत असून कैद्याचा जीव कसा वाचवता येईल आणि हे फोन कसे बाहेर काढता येईल, याचा तपास सध्या सुरू आहे.
सूत्रांनी दिलेल्या माहितीनुसार, हे प्रकरण तिहार कारागृहातील जेल नंबर १ मधील आहे. जिथे मोठ्या प्रमाणात सुरक्षा असते. अशात एका कैद्याच्या पोटामध्ये ५ मोबाईल असल्याची माहिती उघड झाली आहे. खून आणि दरोडा अशा गुन्ह्यात असलेला हा अंडरट्रायल कैदी काही दिवसांपूर्वी कोर्टाच्या तारखेला कारागृहातून बाहेर पडला होता. जिथून तो ५ मोबाईल गिळून तुरुंगात आला. कारागृहाच्या गेटवर झडती टीएसपीने तपास केला होता. जिथे तो अडकला. तुरुंगात जात असताना तो पोटात अडकलेला मोबाईल काढण्याचा प्रयत्न करत होता, तितक्यात त्याला पकडण्यात आलं.
पोटातून मोबाईल काढून शकत नाही हे कळताच कैदी हादरला…
आरोपीने अनेक वेळा पोटातून मोबाईल काढण्यासाठी शक्कल लढवली. पण त्याला ते शक्य झालं नाही. नंतर त्याला आजारपण सुरू झालं. यानंतर तो खूप घाबरला आणि त्याने स्वत: तुरुंग अधिकाऱ्यांना सांगितले की त्याच्या पोटात ५ मोबाईल आहेत. खरंतर, हे ऐकून तुरुंग अधिकारी मोठ्याने हसले आणि म्हणाले की पळून जा, आमच्याशी जोक करू नको. मात्र या कैद्याने पोटावर हात ठेवून ही बाब कारागृह अधिकाऱ्यांना वारंवार गांभीर्याने सांगितल्यावर त्यांनी ही बाब कारागृह प्रशासनाच्या वरिष्ठ अधिकाऱ्यांना सांगितली.
यानंतर सरकारी रुग्णालयात कैद्याच्या पोटाचा एक्स-रे करण्यात आला. जिथे त्याच्या पोटात मोबाईलसारखी प्रतिमा दिसत असल्याची पुष्टी डॉक्टरांनी केली. ज्याची संख्या ५ आहे. हे कीपॅड असलेले छोटे फोन आहेत. हे ऐकून फक्त तुरुंग अधिकारीच नाही तर खुद्द डॉक्टरांनाही धक्का बसला आहे. एखादा माणूस इतके फोन कसे गिळू शकतो, यावर त्यांना विश्वासच बसत नाहीये.
कसे काढणार पोटातून फोन?
कैद्याच्या पोटात फोन असल्याचं कळाल्यानंतर डॉक्टरांच्या समोर ते बाहेर काढण्याचं मोठं आवाहन आहे. यासाठी तज्ज्ञांचाही सल्ला घेतला जात आहे, जेणेकरून हे फोन लवकरात लवकर पोटातून काढता येतील. या आधीही तिहार तुरुंगात अशी काही प्रकरणे समोर आली होती. ज्यामध्ये कैद्यांच्या पोटात फोन सापडले आहेत, मात्र तो एकच असल्यामुळे काढणं शक्य झालं.
