जामखेड प्रतिनिधी
दारू पिण्यास पैसे न दिल्याच्या कारणावरून छगन बबन गोरे याने बाबासाहेब महादेव जगदाळे (वय 65) यांचे डोके रस्त्यावर आपटून खून केल्याची घटना आपटी गावात घडली आहे. पोलिसांनी अवघ्या दोन तासांत आरोपी छगन गोरे याला सिनेस्टाईल पाठलाग करून ताब्यात घेतले आहे. या प्रकरणात मयताचे जावाई देवरथ मिसाळ यांच्या फिर्यादीवरून जामखेड पोलिस स्टेशनला खुनाचा गुन्हा दाखल करण्यात आला आहे.
फिर्यादी देवरथ गंगाराम मिसाळ (वय40) यांनी दाखल केलेल्या फिर्यादीत म्हटले आहे की, आज १९ एप्रिल रोजी सकाळी साडे नऊच्या सुमारास मी घरी असताना घरातील साखर संपल्याने साखर आणण्यासाठी आपटी बसस्टॅन्डवरील रामभाऊ गोरे यांच्या किराणा दुकानात गेलो होतो, साखर घेत असताना आपटी ते पिंपळगाव या रस्त्यावर आरडा ओरडा होत असल्याचा आवाज आल्याने मी पुढे जाऊन पाहिले असताना आमचे गावातील छगन बबन गोरे हा माझे सासरे बाबासाहेब महादेव जगदाळे यांना “तु मला दारु पिण्यासाठी पैसे दे.” असे मोठ-मोठ्याने म्हणुन त्यांना धक्काबुक्की करीत होता. त्यावेळी माझे सासरे हे छगन गोरे याला “माझ्या कडे पैसे नाहीत.” असे सांगत असताना छगन गोरे याने माझे सासरे बाबासाहेब जगदाळे यांना हाताने उचलुन डांबरी रस्त्यावर खाली आपटले. त्यामुळे माझे सासरे मोठ्याने ओरडले. त्यावेळी मी माझे सासरे यांना वाचविण्यासाठी पुढे जात असतानाच छगन गोरे याने माझे सासरे बाबासाहेब जगदाळे यांना परत त्याचे हातांनी उचलुन त्यांना डोक्याच्या बाजुने डांबरी रस्त्यावर आपटले. त्यामुळे माझे सासरे डोके फुटून, डोक्याला चिर पडुन रक्त येवून जाग्यावर निपचित पडले.
त्यावेळी किराणा दुकानदार रामभाऊ गोरे, तानाजी विष्णु गोरे, माझा मेव्हणा दिपक जगदाळे व गावातील इतर लोक त्या ठिकाणी पळत आले. त्यामुळे छगन गोरे हा त्या ठिकाणा वरुन पळुन गेला. त्यावेळी मी माझे सासरे यांच्याजवळ जावुन त्यांना उचलण्याचा प्रयत्न केला परंतु ते आचक्या देत असल्याने मी किराणा दुकानातुन पाणी आणुन पाजले परंतु त्या वेळी माझे सासरे यांचा जीव गेलेला होता असे फिर्यादीत म्हटले आहे. दरम्यान घटनेची माहिती समजताच जामखेड पोलिसांनी तातडीने घटनास्थळी धाव घेऊन मृतदेह ताब्यात घेतला, जामखेड ग्रामीण रूग्णालयात शवविच्छेदन करण्यात आले. दरम्यान पोलिस निरीक्षक संभाजीराव गायकवाड, सहाय्यक पोलीस निरीक्षक सुनिल बडे, पोलिस उपनिरीक्षक राजु थोरात यांच्यासह पोलिस नाईक संभाजी शेंडे, पोलिस नाईक अविनाश ढेरे, पो.ना जाधव, पोशि शेषराव म्हस्के, पो.शि. पवार, पोशि आबासाहेब आवारे, अजय साठे यांच्या पथकाने घटनेनंतर पळून गेलेल्या आरोपीचा पाठलाग करून आरोपीला नान्नज येथून घटनेनंतर अवघ्या दोन तासात ताब्यात घेतले. पोलिस निरीक्षक संभाजीराव गायकवाड यांच्या मार्गदर्शनाखाली सहाय्यक पोलिस निरीक्षक सुनील बडे हे पुढील तपास करीत आहेत.
